नेवाशात काँग्रेस स्थानिक स्वराज्य संस्था निवडणूक स्बबळावर लढण्याच्या तयारीत

( नेवासा प्रतिनिधी ) :-  नेवाशात काँग्रेस पक्ष  येणाऱ्या स्थानिक स्वराज्य संस्थाच्या निवडणुका स्वबळावर लढण्याच्या तयारीत असल्याचे काँग्रेसचे संभाजी माळवदे यांनी स्पष्ट केले. 

 स्थानिक स्वराज्य संस्था निवडणुकीचा बिगुल वाजला असून सर्वच पक्ष आपापल्या परीने तयारीला लागले आहे.  जिल्हा परिषद, पंचायत समिती, नगरपंचायत या निवडणुकीच्या तयारीसाठी  पक्ष पातळीवर बैठका सुरु झाल्या आहेत.नुकत्याच काँग्रेस पक्षाच्या झालेल्या जिल्हा स्तरीय बैठकीत नेवासा काँग्रेस पूर्ण ताकतीने स्वबळावर निवडणूक लढविण्याच्या तयारीत असल्याचे स्पष्ट मत काँग्रेसचे संभाजी माळवदे यांनी मांडले. नेवासा तालुक्यात जिल्हापरिषदेचे सात गट व  पंचायत समितीचे चौदा गण या एकवीस जागा लढविण्याची तयारी पक्षाची असून नगरपंचायतीच्या नगराध्यक्ष पदासह सतरा जागा लढविण्याची तयारी काँग्रेसची असल्याचे मत माळवदे यांनी स्पष्ट केले. यासाठी लवकरच इच्छुक उमेदवाराच्या मुलाकती घेण्यात येणार असल्याचेही स्पष्ट करण्यात आले. स्थानिक स्वराज्य संस्था निवडणुक ही कार्यकर्त्यांची निवडणूक असून सामान्य कार्यकर्त्यास संधी मिळाली पाहिजे इतर पक्षांच्या आघाडीमुळे काँग्रेस कार्यकर्त्यावर नेहमी अन्याय होत आला आहे. इतर पक्षाशी केलेल्या आघाडीमुळे काँग्रेसची राष्ट्रीय ओळख संपुष्टात   आल्याचे मत माळवदे यांनी मांडले. येत्या दोन दिवसात  काँग्रेस पक्ष निरीक्षकांची नेवाशांत बैठक होणार असून त्यानंतर काँग्रेस कार्यकर्ते पूर्ण तयारीला लागतील अशी माहिती माळवदे यांनी दिली.